#IPL2019 आज अंतिम सामन्याचा थरार! चौथ्या जेतेपदाला मुंबई का चेन्नई गवसणी घालणार? – eNavakal
आघाडीच्या बातम्या क्रीडा

#IPL2019 आज अंतिम सामन्याचा थरार! चौथ्या जेतेपदाला मुंबई का चेन्नई गवसणी घालणार?

हैदराबाद – गेले सव्वा महिना सुरू असलेल्या आयपीएल चषक क्रिकेट स्पर्धेचा 12 व्या मोसमाचा आज येथील राजीव गांधी आंतरराष्ट्रीय स्टेडियमवर समारोप होत असून माजी विजेते मुंबई आणि गतविजेते चेन्‍नई यांच्यातील कुठला संघ चौथ्यांदा ही स्पर्धा जिंकणार याबाबत दोन्ही संघांच्या कोट्यवधी चाहत्यांमध्ये उत्सुकता शिगेला पोहोचली आहे.

उभय संघांनी प्रत्येकी तीन वेळा ही स्पर्धा जिंकली असून उद्या जेतेपदाचा चौकार कोण मारणार? याची प्रतीक्षा तमाम भारतीय क्रिकेटप्रेमींना लागून राहिली आहे. यंदाच्या मोसमात झालेल्या उभय संघातील तीनही लढतीत मुंबईने बाजी मारली होती. त्यामुळे विजयाचा चौकार ठोकून चौथ्या जेतेपदाला गवसणी घालण्यासाठी रोहित शर्माचा मुंबई संघ सज्ज झालेला आहे. तर गेल्या तीन सामन्यांतील पराभव धोनी आणि त्यांच्या सहकार्‍यांना जिव्हारी लागला असून त्याचा बदला घेण्यास चेन्‍नई संघदेखील जोरदार प्रयत्न करील, यात शंका नाही. चेन्‍नईने तब्बल आठव्यांदा तर मुंबईने पाचव्यांदा स्पर्धेची अंतिम फेरी गाठली होती.

उभय संघात चौथ्यांदा अंतिम फेरीचा मुकाबला पुन्हा एकदा रंगणार आहे. अगोदर झालेल्या तीन अंतिम फेरीच्या लढतीत मुंबईने दोनदा तर चेन्‍नईने एकदा बाजी मारली होती. 2015 मध्ये उभय संघात अंतिम सामना झाला होता. कोलकाता येथे झालेल्या सामन्यात मुंबईने जेतेपदाला गवसणी घातली होती. यंदा गुणतालिकेत मुंबई पहिल्या क्रमांकावर तर चेन्‍नई दुसर्‍या क्रमांकावर होती. कागदावर तरी रोहित शर्माच्या मुंबई संघाचे पारडे जड दिसत आहे. उभय संघात झालेल्या सामन्यांची आकडेवारीदेखील मुंबईच्याच बाजूने जास्त झुकली आहे. चेन्‍नईपेक्षा मुंबईने यंदाच्या स्पर्धेत सातत्यपूर्ण चांगली कामगिरी केली आहे.

मुंबईच्या संघात अष्टपैलू खेळाडूंचा जास्त भरणा असून त्याचा फायदा मुंबईला या स्पर्धेत मिळाला आहे. तसेच मुंबईने यंदाच्या स्पर्धेतील तीनही लढतीत चेन्‍नईविरुद्ध मिळालेल्या विजयामुळे संघाचे मनोधैर्य निश्‍चितच उंचावले असेल. प्रत्येक सामन्यात मुंबईच्या एक-दोन खेळाडूंनी मोठे योगदान देऊन मुंबईला शानदार विजय मिळवून दिले. मुंबईचा सलामीवीर डिकॉकने सातत्याने चांगली फलंदाजी करून मुंबईची एक बाजू लावून धरली. त्यानेच मुंबईतर्फे आतापर्यंत सर्वाधिक धावा या स्पर्धेत केल्या आहेत. कर्णधार रोहित शर्माला मात्र विशेष सूर गवसला नाही. अवघी दोन अर्धशतके यंदा त्याला 15 सामन्यांत काढता आली आहेत. अंतिम सामन्यात मोठी खेळी करून शर्मा या स्पर्धेचा जोरदार समारोप करेल, अशी आशा त्याचे चाहते करत असतील. सूर्यकुमार यादव, हार्दिक पांड्या, कुणाल पांड्या यांनीदेखील चांगली फलंदाजी करून मुंबईच्या डावाला आकार देण्याचा नियमित प्रयत्न केला.

पोलार्डने मात्र अवघ्या एकाच लढतीत अर्धशतकी खेळी केली. अंतिम सामन्यात तोदेखील आपल्या बॅटचा प्रताप दाखवेल, अशी आशा संघव्यवस्थापन करत असेल. गोलंदाजीत बुमराह, मलिंगा, पांड्या बंधू, चहर यांनी आपली कामगिरी चोख पार पाडली आहे. बुमराहने सर्वाधिक 17 बळी घेतले होते. तर मलिंगाने 15 बळी घेतले आहेत. कर्णधार महेंद्रसिंग धोनीनेच सातत्याने दमदार फलंदाजी करून चेन्‍नईचा किल्‍ला समर्थपणे लढविला. इतर फलंदाजांना मात्र सातत्याने मोठी धावसंख्या काढता आली नाही. सलामीवीर डुप्लिसिसने डिकॉकप्रमाणेच त्यांचा किल्‍ला लढविला. त्याने आपल्या फलंदाजीचा ठसा स्पर्धेवर उमटवला. त्याचा सहकारी वॅटसन मात्र अपयशी ठरला. 16 सामन्यांत अवघी दोन अर्धशतके वॅटसनला काढता आली. अंबाती रायडू, सुरेश रैना यांना या स्पर्धेत अद्याप सूर गवसलेला नाही. जडेजा, ब्राव्हो यांनादेखील फलंदाजीत प्रभाव पाडता आला नाही. वेगवान गोलंदाज दीपक चहर, ब्राव्हो, हरभजन सिंग, इम्रान ताहिर यांच्यावर त्यांची गोलंदाजीची मोठी मदार राहणार आहे. ताहिरने सर्वाधिक 24 बळी आतापर्यंत घेतले आहेत.

फलंदाजांची समस्या चेन्‍नई संघाला भेडसावत आहे. सुरेश रैना, अंबाती रायडू अंतिम सामन्यात चांगली कामगिरी करतील, अशी आशा संघव्यवस्थापन करतील. दोन्ही संघांची फलंदाजी आणि गोलंदाजी भक्‍कम असून बॅट-बॉलमधील हा अंतिम मुकाबला रंगतदार होण्याची अपेक्षा क्रिकेट वर्तुळात केली जाते. हैदराबादची खेळपट्टी फलंदाजांनाच अनुकूल ठरते. त्यामुळे निर्णायक सामन्यात मोठी धावसंख्या होण्याची शक्यता व्यक्‍त केली जात आहे. यजमान हैदराबादचा संघ अंतिम सामन्यात नसल्यामुळे त्यांच्या चाहत्यांची मात्र चांगलीच निराशा झाली आहे.

Sharing is caring!

You may also like

Read More

post-image
आघाडीच्या बातम्या महाराष्ट्र राजकीय

अमित शहा मुंबईत दाखल; गोरेगावमध्ये सभेचे आयोजन

मुंबई – महाराष्ट्र विधानसभा निवडणुकीच्या तारखा अखेर जाहीर झाल्या आहेत. त्यासोबतच आचारसंहिताही लागू करण्यात आली आहे. त्यानंतर भारतीय जनता पक्षाचे राष्ट्रीय अध्यक्ष व केंद्रीय...
Read More
post-image
आघाडीच्या बातम्या मनोरंजन

‘तुमच्याकडे काही काम नसेल तर मीम्स बनवा’, सोनाक्षीचे ट्रोलर्सना उत्तर

मुंबई – कौन बनेगा करोडपती -11 मध्ये अभिनेत्री सोनाक्षी सिन्हाच्या रामायण या पौराणिक कथेतील प्रश्‍नावरील उत्तराने सोशल मीडियावर प्रचंड ट्रोल व्हावे लागत आहे. सोनाक्षी...
Read More
post-image
लेख

व्हिएतनाम युद्धाविरोधात उभी राहिलेली अमेरिकेची आघाडीची अभिनेत्री जेन फोंडा

साठ-सत्तरच्या दशकातील अमेरिकेची आघाडीची, सुप्रसिद्ध, नामवंत अभिनेत्री जेन फोंडा एका वेगळ्याच कारणासाठी सगळ्या जगभर ओळखली जाते आणि अमेरिकेतील लाखो लोकांकडून तिच्यावर आजही प्रखर टीका...
Read More
post-image
देश

एव्हरेस्ट सर करणाऱ्या पहिल्या महिलेला गुगलची मानवंदना

नवी दिल्ली – जगप्रसिद्ध गिर्यारोहक आणि माउंट एव्हरेस्ट सर करणाऱ्या पहिल्या महिला जुन्को ताबेई यांचा आज 80 वा स्मृतिदिन आहे. यानिमित्ताने गुगलने खास डूडल...
Read More
post-image
देश

भारत २०२१ पर्यंत पहिल्या भारतीयाला स्वतःच्या रॉकेटमधून अंतराळात पाठवणार

नवी दिल्ली – आज ‘लँडर विक्रम’च्या अवतार कार्याचा शेवटचा दिवस होता. मात्र लँडर विक्रमशी संपर्क होऊ शकला नाही. उरली सुरली आशा संपल्यावर इस्त्रो’चे प्रमुख डॉ....
Read More