पुणे – महाराष्ट्रातील पुणे जिल्ह्यातील पिंपरी चिंचवडमधून एक धक्कादायक बातमी हाती येतेय. इथं आपल्या चिमुरड्याला वाचवण्यासाठी एक आई थेट बिबट्याशी भिडली. शेतात झोपलेल्या एका कुटुंबावर बिबट्यानं हल्ला केला. झोपलेल्या चिमुरड्याला आपल्या जबड्यात पकडत बिबट्यानं पळून जाण्याचा प्रयत्न केला. परंतु, या बिबट्याचा चिमुरड्याच्या आईनं प्राण पणाला लावून सामना केला. या आईच्या साहसाची चर्चा परिसरात केली जातेय. जुन्नर तालुक्यातील ढोलवाड गावात ही घटना घडलीय. सदर कुटुंबातील दाम्पत्य ऊस कामगार म्हणून काम करतात. गुरुवारी रात्री उशिरा उसाच्या शेतानजिक असलेल्या झोपड्यात झोपलेले असताना बिबट्यानं 18 महिन्यांच्या चिमुरड्यावर झडप घातली. ज्ञानेश्वर असं या चिमुरड्याचं नाव आहे. ‘आम्ही रात्री झोपलेलो असताना बिबट्यानं माझ्या मुलाला पकडून खेचून घेऊन जाण्याचा प्रयत्न केला. हालचालीमुळे मला आणि माझ्या पतीला जाग आली आणि आम्ही आमच्या मुलाला वाचवण्याचा प्रयत्न केला’ असं या चिमुरड्याचीआई दीपाली यांनी म्हटलंय.
