पनवेल – पनवेल महानगरपालिका हद्दीत सातत्याने वाढत जाणारी रुग्णसंख्या पाहता पनवेलमध्ये कडक लॉक डाउन जारी करावा अशी मागणी विरोधी पक्षनेता प्रितम म्हात्रे यांनी महापालिकेला केली आहे. रायगडच्या पालकमंत्री अदिती तटकरे यांच्याकडे देखील प्रीतम म्हात्रे यांनी पनवेल महापालिका क्षेत्रात टाळेबंदी (लॉकडाऊन) करण्याची मागणी केलेली आहे.
पनवेल महानगरपालिका विभागात काही आठवड्यांनपासून कोरोनाचा प्रादुर्भाव वाढत आहे. दरदिवशी शंभरीच्या आसपास कोरोनाग्रस्त रुग्ण आढळून येत आहेत. त्यामुळे पनवेल महानगरपालिका हद्दीत लॉकडाऊन करण्यात यावे अशी मागणी आता महापालिकेचे विरोधी पक्षनेते प्रितम म्हात्रे यांनी आयुक्तांकडे केली आहे.
कॉरोनाकाळातही नागरिक सुद्धा बाजारात मोठ्या प्रमाणात खरेदी करण्यासाठी घराबाहेर पडत आहेत. आता बाजारातही अशी अधिक गर्दी होत आहे आणि त्यातच वाहनांची वर्दळ देखील वाढली असल्याने वाहतूक कोंडी देखिल सतावू लागली आहे. तसेच आता वेगवेगळ्या ठिकाणी लोक मोठ्या प्रमाणात गर्दी करत असल्याने कोरोना विषाणूचा संसर्ग वाढू लागलेला आहे. आता त्यामुळेच महानगरपालिका हद्दीतील कोरोनाच्या रुग्णांची संख्या ही मोठ्या प्रमाणात वाढताना दिसत आहे. त्यावेळी लॉकडाऊनच्या काळात रुग्णांची संख्या २० ते २५ च्या घरात होती. मात्र लॉकडाऊन शिथिल झाल्यानंतर ग्रामीणभाग आणि शहरी भागात झपाट्याने कोरोनाबाधित रुग्णांची संख्या वाढत गेली. पण याला आता कुठेतरी आळा बसावा व कोरोना रुग्णांची ही साखळी तुटावी यासाठी पनवेल महानगरपालिकेने किमान आठ दिवसांसाठी तरी अत्यावश्यक सेवा वगळता संपूर्ण लॉकडाऊन करण्याची मागणी पनवेल महानगरपालिकेचे विरोधी पक्षनेते प्रितम म्हात्रे यांनी पालिका आयुक्त सुधाकर देशमुख यांच्याकडे ई-मेल द्वारे केलेली आहे.