मुंबई -एसटी महामंडळाचे अधिकारी आणि कर्मचार्‍यांना दिवाळी भेट देण्याची घोषणा राज्याचे परिवहन मंत्री तथा एसटी महामंडळाचे अध्यक्ष दिवाकर रावते यांनी आज येथे केली. कर्मचार्‍यांना 2500 रुपये तर अधिकार्‍यांना 5000 रुपये दिवाळी भेट मिळणार आहे. याशिवाय एसटी अधिकार्‍यांना 10 टक्के इतकी अंतरीम वेतन वाढ देण्याचा तसेच एसटी कर्मचारी आणि अधिकार्‍यांच्या महागाई भत्त्यात वाढ करण्याचा निर्णयही आज जाहीर करण्यात आला. यामित्ताने मंत्री दिवाकर रावते यांनी एसटी अधिकारी आणि कर्मचार्‍यांना दिवाळीची अनोखी भेट दिली.
मंत्री रावते म्हणाले की, एसटी कर्मचारी आणि अधिकार्‍यांना अनुक्रमे 2500 आणि 5000 रुपयांची दिवाळी भेट देण्याचा निर्णय घेण्यात आला आहे. अधिकारी-कर्मचार्‍यांना ही दिवाळी भेट तातडीने देण्यात यावी, अशा सूचना संबंधीतांना देण्यात आल्या आहेत. एसटी अधिकार्‍यांच्या वेतनात त्यांच्या एकूण वेतनाच्या 10 टक्के इतकी अंतरीम वाढ करण्याचा निर्णयही मंत्री रावते यांनी आज जाहीर केला. ऑक्टोबर 2018 पासून ही वेतनवाढ लागू होईल. एसटी अधिकारी आणि कर्मचार्‍यांच्या महागाई भत्त्यामध्येही वाढ करुन मंत्री रावते यांनी अधिकारी-कर्मचार्‍यांना दिवाळीची अनोखी भेट दिली. त्यानुसार राज्य शासनाप्रमाणे एसटी अधिकार्‍यांच्या महागाई भत्त्यात 6 टक्के इतकी वाढ जुन्या वेतनानुसार करण्यात आली. वेतनवाढीमुळे एसटी कर्मचार्‍यांचे वेतन आधीच सुधारीत झाले आहे. त्यांच्या महागाई भत्त्यामध्ये केंद्र शासनाप्रमााणे 2 टक्के इतकी वाढ करण्याचा निर्णय घेण्यात आला. ऑक्टोबर 2018 च्या वेतनापासून हा महागाई भत्ता देण्यात येईल. एसटी कर्मचार्‍यांना जाहीर करण्यात आलेल्या पगारवाढीतील मागील थकबाकीतील 5 हप्त्यांची रक्कमही दिवाळीच्या पार्श्वभूमीवर येत्या 1 नोव्हेंबर रोजी त्यांना अदा करण्यात यावी, असे आदेशही महामंडळाला देण्यात आल्याचे रावते यांनी सांगितले.
